Egun, bakea, zutaz, kantatzerat noa,
iraganan aspalditik banuen gogoa ;
gizonen zorionak zu zaitu erroa,
ontasun guzietan Pare gabekoa,
bakan aurkitzen ziren lore arradoa.
Denek dugu bakea gure mingainean,
nahiz herra bazkatu bihotzen barnean ;
betidanik bezala, gaurko egunean,
hameka giristinok lur hunen gainean
gerla egiten dugu zure izenean.
Munduari begira egon naiz bortzetan :
zonbat jende bizi den lege zorrotzetan,
bizientzat eraiki hil-harri hotzetan ;
hek ez dute sartzerik gerlako gauzetan,
bainan ez da bakerik heien bihotzetan.
Jo araztenen diete bi belaunez lurra,
ixilik egon diten, tinkatuz zintzurra ;
itotzen badute’re heien arangura,
ez diete itzaltzen barneko su hura ;
bake sortaraztaile txarra da beldurra.